ÀÖ²¥´«Ã½

Ym Mhrifysgol Bangor, mae troseddeg yn fwy na damcaniaeth yn unig, mae'n archwilio materion byd go iawn megis trosedd, cyfiawnder a diogelwch cymunedol. Mi fyddi’n mynd i’r afael â chwestiynau megis:

• Pam mae pobl yn cyflawni troseddau?
• Sut mae’r system gyfiawnder yn gweithio?
• Beth allwn ni ei wneud i greu cymunedau mwy diogel a thecach? 

O blismona a chosbi, i adsefydlu ac atal, mi fyddi’n ennill dealltwriaeth ddyfnach o sut mae cymdeithas yn mynd i'r afael â throseddu, a sut alli di droi dy wybodaeth yn weithredoedd a bod yn rhan o'r ateb.

Mae ein modiwl lleoliad gwaith yn caniatáu i ti ennill profiad gwerthfawr mewn diwydiannau sy'n gysylltiedig â throseddeg a chyfiawnder troseddol, gan roi hwb i dy CV a gwella dy gyflogadwyedd.

Mae myfyrwyr blaenorol wedi gweithio gyda sefydliadau megis Cymorth i Ddioddefwyr a Chyngor ar Bopeth, gan ddatblygu sgiliau cyfathrebu a dysgu sut i reoli sefyllfaoedd heriol. 

Mae posib i ti hefyd ddewis ymgymryd â 'Blwyddyn Lleoliad Gwaith', gan weithio gyda sefydliad hunan-ffynhonnell sy'n berthnasol i dy astudiaethau, gan ennill mewnwelediad i'r byd go iawn a meithrin cysylltiadau gwerthfawr â'r diwydiant.

O dy flwyddyn gyntaf, mi fyddi’n ymchwilio i'r materion cymdeithasol sy'n gysylltiedig â throseddu a chyfiawnder ac yn archwilio sut mae troseddu'n effeithio ar unigolion a chymunedau. Mi fyddi’n archwilio pynciau megis addysg, iechyd meddwl, a dosbarth cymdeithasol, gan ennill safbwynt ehangach a dealltwriaeth ddyfnach o sut mae trosedd yn effeithio ar gymdeithas.

Efallai y cei cyfleodd i gymryd rhan mewn mentrau megis Darllen a Thyfu, lle mae myfyrwyr yn cefnogi cyn-droseddwyr ar eu taith adsefydlu. Gall profiadau fel hyn ddyfnhau dy ddealltwriaeth o weithio gyda phobl sydd â phrofiad uniongyrchol o'r system cyfiawnder troseddol.

Mae gradd mewn troseddeg yn agor drysau i ystod eang o yrfaoedd cyffrous ac ystyrlon. Rydyn ni’n canolbwyntio ar ddarparu’r offer, y sgiliau a'r cyfleoedd i ti adeiladu dyfodol sy'n gwneud gwahaniaeth.

Mae'r radd yn dy baratoi i ymgymryd â swyddi ym meysydd megis:

• Gwasanaethau prawf
• Cyfiawnder ieuenctid
• Gwasanaethau carchardai ac adsefydlu
• Diogelwch cymunedol
• Diogelwch
• Llywodraeth leol a chenedlaethol
• Cyrff anllywodraethol ac elusennau

Ym Mhrifysgol Bangor, mi fyddi’n rhan o gymuned academaidd groesawgar a chefnogol. Mae ein staff yn gyfeillgar, yn hygyrch, ac wir wedi buddsoddi yn dy lwyddiant. 

Mi fyddi’n cael tiwtor personol o'r diwrnod cyntaf, ac mae ein polisi drws agored yn golygu bod cymorth ar gael drwy’r amser. Y tu hwnt i’r gefnogaeth academaidd, mae ein timau ehangach yma i helpu gyda phopeth, o gyllid a thai, i iechyd a llesiant